१.      सर्लाही, पर्सा गाउँपालिका ६ गाँउपालिका चोक स्थितबाट लागू औषध नाईट्राभेट ट्याब्लेट ४१ पत्तामा १२३० पिस, स्पाईस ७ पत्तामा १६८ पिस र सिनारेक्स १०० ml को १ बोतल सहित ब्रहम्पुरी गाउँपालिका ६ बस्ने बेचन राय यादवको छोरा बर्ष १९ को रबि कुमार यादव र सोही स्थान बस्ने सुनिल कुमार यादवको छोरा बर्ष २२ को राहुल कुमार यादवलाई सोमबार दिउँसो प्रहरीले पक्राउ गरेको छ । जिल्ला प्रहरी कार्यालय सर्लाहीबाट खटिएको प्रहरी टोलीले भारतबाट नेपाल तर्फ आउँदै गरेको BR-30-7016 नम्बरको मोटरसाइकललाई शंका लागी चेक जाँच गर्दा निजहरुलाई उक्त परिमाण बराबरको लागू औषध सहित नियन्त्रणमा लिएको हो । यस सम्बन्धमा प्रहरीले आवश्यक अनुसन्धान गरिरहेको छ ।

२.      धनुषा, मिथिला नगरपालिका ६ ढल्केबर बस्ने बर्ष ६८ को खिचडी बाबा भन्ने राम कुमार महतोको घरमा लागू औषध लुकाई छिपाई राखेको भन्ने बिषेश सुचनाको आधारमा सोमबार दिउँसो इलाका प्रहरी कार्यालय ढल्केबर र लागू औषध नियन्त्रण व्यूरो शाखा कार्यालय बर्दिबासबाट खटिएको संयुक्त प्रहरी टोलीले चेक जाँच गर्ने क्रममा निजको घरमा लुकाई छिपाई राखेको लागू औषध गाँजा २७ के.जी., लागू औषध चरेस ३०० ग्राम, ने. रु. २८,५००/- (अट्ठाईस हजार पाँच सय रुपैयाँ मात्र), भा. रु. ११,१००/- (एघार हजार एक सय रुपैयाँ मात्र), तराजु २ थान, सो को ढक (१ के.जी.को १ थान र ५०० ग्रामको ३ थान) र लागू औषध गाँजा प्याक गर्ने प्लाष्टिकको थैली अन्दाजी २ के.जी. ५०० ग्राम सहित निज खिचडी बाबा भन्ने राम कुमार महतोलाई नियन्त्रणमा लिएको हो । यस सम्बन्धमा प्रहरीले आवश्यक अनुसन्धान गरिरहेको छ ।